Salvar la Autoridad Nasionala del Ladino

TIEMPO DE AZER I NO KAYAR

PETISION PARA LA SALVASION DE LA

AUTORIDAD NASIONALA DEL LADINO

Mozotros, los sefaradis ladino-avlantes, desendientes de los djudios ekspulsados de Espanya ke transformaron el ladino en el simbolo de una importante kultura djudia;

Mozotros, los aktivistas i voluntarios ke estamos ovrando de alma i korason, en los sirkolos de ladino en Israel i otras partes del mundo;

Mozotros, los ijos i inyetos de las milarias de ladino-avlantes ke fueron eksterminados en los kampos de la muerte durante la II Gerra Mundiala, i ke sus ultimo grito antes de murir fue en esta lengua;

Mozotros, los investigadores i promotores de esta kultura en universidades ansi ke en sentros akademikos i kulturales; los jurnalistas, poetas, eskritores, artistas i aktores ke kon sus kreasiones en ladino kontribuyen al enfloresimiento de la kultura djudeo-espanyola; i tambien todos los ke no apartenemos al publiko sefaradi ma apresiamos la importansia de su kultura

yamamos a la Ministra de Kultura del estado de Israel, Sra. Limor Livnat i a los miembros de la Keneset, a no anular la Ley de la Autoridad del Ladino i su Kultura. No tenemos dinguna opozision a la kreasion de una Autoridad para el Patrimonio de las Komunidades en Israel, sigun es propozado en la mueva ley; ma pensamos, djuntos kon esto, ke la anulasion de la ley para la Autoridad del Ladino i su Kultura seria un golpe muy duro a toda la aktividad en el kampo del ladino ke, desde la fondasion de la A.N.L unos 15 anyos atras, esta enfloresiendo de manera muy apresiable aun ke ainda el kamino es largo i ay muncho ke azer.

Los ladino-avlantes somos buenos embasadores, del puevlo djudio i de Israel, frente a Espanya i otros paizes de avla espanyola, ke konsideran al ladino i su kultura komo parte integrala de la kultura panispanika ke konta mas de 300 miliones de almas en el mundo.  Espanya, i la UNESCO tambien, rekonosieron al ladino komo un trezoro kultural mundial ke deve ser mantenido i transmetido a las sigientes jenerasiones.

Es ke djustamente Israel puede tomar sovre si la responsabilidad por la anulasion de la Ley de la A.N.L., inyorando su importansia i el rekonosimiento internasional de los kualos esta gozando la kultura djudeo-espanyola?

Preokupados por las konsekuensas de un tal paso para el futuro del ladino i su kultura, en Israel i en el mundo, protestamos enerjikamente kontra esta inisiativa i demandamos ke kede en vigor la Ley para la Autoridad del Ladino i su Kultura, sin ningun trokamiento en su estatuto aktual.